聽講之前競猜熱火輸Game 5嘅比例係9比1：主將Goran Dragić繼續受傷，Crowder同Bam Adebayo完全比以AD為首嘅內線克制住；7個主力輪替有3個係新秀；再加埋打得咁好嘅Game 4都比湖人完封，基本上呢一場Game 5就等如人人睇低嘅湘北對山王，大家都只當係例行工事而已。
但正如安西教練話齋，一旦你放棄的話，比賽就到此結束了；相反即使係輸咗九成，只要堅持落去，反勝機會唔係漫畫先有。
先係Anthony Davis響比賽中段受傷，雖然開頭仲好似無事咁，但去到後面已好難再隱藏傷勢，基本上連回防嘅速度都無埋；再黎就係Danny Green維持慣常嘅失準狀態，Kuzma又犯上集中力下降問題，結果熱火三井Tyler Herro+Duncan Robinson完全中和咗湖人嘅後追壓力。
結果去到最後幾分鐘，終於變成Jimmy Butler同Lebron James單對單對轟戰。之前McHale仲話熱火隊最大問題係一個鉅星都無，去到最後決勝負階段唔知交比邊個處理好，而家熱火福田就用表現黎打臉，單人匹馬搞掂湖人牧紳一。
去到最後一個Play，Jeff Van Gundy已多番強調，佢係Erik Spoelstra就一定唔會比LBJ掂波，寧願放比其他人射3分，輸波那就認命鳥。結果LBJ真係拎倒個波，但佢選擇「相信隊友」，放棄同Jimmy Butler嘅最後對決而比Danny Green射3分，就係呢個最應該獨食嘅決心怯咗一怯，反而打足47分鐘嘅Jimmy Butler一人擔起攻防主軸到底令佢贏咗呢場。
AD傷咗之後，本來諗住捱多半節頂埋個冠軍番黎；而家仲要打多場Game 6，壓力反而去番湖人度之餘，仲要唔知出唔出得番，但無論點發展都好，無人會再覺得呢個總冠軍系列係枯乏無味啦掛。同埋更重要嘅係，本來所有人都覺得，熱火響戰力懸殊之下，贏番一兩場，已算係對得住支持者同觀眾，有所交待鳥；
但Jimmy Butler從來唔係咁諗。佢就係覺得自己贏倒總冠軍，同福田覺得自己贏倒仙道彬一樣。而家無人敢再睇輕佢呢個目標鳥
#不過唔該唔好拎飯民捐狗窿入臨立會黎比較
#佢地果啲唔係叫堅持到底
#叫呃飯食
Search